İZZET MOLA DİVANI-Her dem dilerim hazretiñe olmaga vâsıl

 

BEYİTLER

1 Her dem dilerim hazretiñe olmaga vâsıl

Yâ Rabbi murâdım nice bir olmaya hâsıl

2 Her berg-i giyâh âdeme dir hâl-i dil ile

Gâfil ne turursun ‘aceb ‘ömriñ katı ‘âcil

3 Hem eşref-i mahlûk ola hem kişi cihâna

Âdem gele hayvân gide ‘akl ola mı kâ’il

4 Yek başına bulsaydı delîlsizce tarîkin

Olurdı gedâ sa‘y ile şeh bezmine dâhil

5 Yokdan beni var eyledigiñ gibi İlâhî

Halk it düşeyim pâyına bir mürşid-i kâmil

6 Çeksin beni tutsun elimi râh-ı necâta

İmdâd ile irşâd ide bir rehber-i fâzıl

7 Feryâdı ko Monlâ gibi Hünkâr kapusundan

Hâşâ Şeref ihsân uma da boş gide sâ’il